எங்கள் தளத்தில் எழுத விரும்பும் எழுத்தாளர்கள் எங்களை கீழ் உள்ள மின்னஞ்சலில் தொடர்ப்புக்கொள்ளவும் நன்றி Email ID - narumugai.ink@gmail.com

மௌனப் பெருவெளி

admin

Administrator
Staff member
யாரோ கலைத்துப் போட்ட
கூட்டைப் பார்த்துப்
பரிதவிக்கிறது தேனீயின்
மௌனம்

வண்டிற்கு விரிந்து
கொடுத்த முதல் இதழை
வெறிக்கிறது பூவின்
மௌனம்

சிறகை விரிக்க முதல்
இறக்கைக்காக
காத்திருக்கிறது
கூட்டுப்புழுவின்
மௌனம்

முழுதாய் ஒளிந்து கொள்ள
இருளுக்காக
நகர்கிறது நிலவின்
மௌனம்

புலரும் பொழுதுகளில்
பறவைகளின்
கீச்சொலிகளால்
நிறைகிறது விடியலின்
மௌனம்

கடலின் கரை தழுவும்
நொடியில் கரைந்தே
போகிறது அலையின்
மௌனம்

மான் மயங்கும்
நிமிடத்திற்க்காக
அசையாமல்
நிதானிக்கிறது புலியின்
மௌனம்

முதல் மனித காலடியில்
முற்றாய் உருக்
குலைக்கிறது காட்டின்
மௌனம்

அறுத்தெடுத்த தொப்புள்
கொடி ஆறாமல்
சொல்கிறது தாயின்
மௌனம்

தலை கோதும் அப்பாவின்
விரலைத்
தேடுகிறது இரவின்
மௌனம்

நீண்ட உரையாடலின்
அலைபேசிச் சூட்டில்
அதிகரிக்கிறது நட்பின்
மௌனம்

தூரத்திலும் குறையாத
செல்லச் சண்டைகளில்
நீடிக்கிறது நேசத்தின்
மௌனம்

இப்படிப் பெருவெளியே
மௌனங்களால்
நிறைந்திருந்தால்
மௌனப்
பெருவெளிக்கென
எங்கே போவேன் நான்…

அப்படி எங்கேனும்
நீ நிறைந்திருந்தால்
எப்படி உனைச் சேர்வதென
இப்படிக் கொஞ்சம்
சொல்லியனுப்பேன்

உன்னோடு
பெருவெளியைப்
பகிர்ந்து கொள்ள
மாட்டேன்…
என் மௌனப்
பெருவெளியே
உன் மௌனத்தில்
கரைந்தே போவேன் நான்…
 
Top