மெளனப் பெருவெளி

[admin]

கடல் குளித்து
சிவப்புக் கதிரவன்

தலை துவட்டும் முன்பே

துயில் கலைத்தெழுந்து

நீராடச் செல்கிறாய்

நீ



இமைப்பொழுதிலும்
கால் பொழுதில்

உன்

பார்வை உரசும்

சுகத்தீயில்

குளிர்காய்ந்து உவக்கிறது

என்

கள்ளமனம்



உன்
செம்பாதம் பட்டுச் சிலிர்த்த

தடாகக் குளிர் நீர்

விட்டப் பெருமூச்சில்

எழுந்து கலைகின்றன

அரை வட்ட அலைகள்



நீரில் இறங்கி
நீ

மூழ்கிக் குளிக்கையில்

வெட்கி மறைந்து

எட்டிப்பார்க்கும்

குளவாம்பல் கூட்டத்தோடு

கூட்டுக்களவாணிகளாய்

இணைகின்றன

என் கண்கள்



வெண்பனி முத்துக்கள் தூவிய
மரகதப் புல்வெளியில்

நடை போட்டுத் திரும்பும்

உன்னோடு

விரல் கோத்து நடக்கிறது
ஆசைக்காதல்



காத்திருந்து
உனை வரவேற்றுச் சிரிக்கும்

பாதையோரப் பூக்களோடு

தவமிருக்கும் எனை நோக்கி

இதழ் மலர்த்தி

நீ ஒளிர்வித்த
மென்னகையில்

உடைந்து போகிறது

இத்தனை நாள்

எதிரியாய் திரை போட்ட
மெளனப் பெருவெளி

--இராஜசேகரன்,
22-L, ஐ.பி.கோயில் தெற்குத்
தெரு,
திருவாரூர் - 610 001
கைப்பேசி: 9751941781
​